Bizkaiko Kanpuseko kiroldegiko BEZ-a %8tik %21era igoko da urrian

Maider LETURIAGA ANGOITIA

Hurrengo hilabeteetan BEZak izango duen igoera ere atzemango dute aurten Leioako Euskal Herriko Unibertsitateko kanpuseko kiroldegia erabiltzen duten ikasle eta bezeroek. Izan ere, zergak %8tik %21erako igoera izango duela nabarmendu du kiroldegiko harreragilea den Unai Ormaetxea. Nahiz eta, bezeroengan oraindik eraginik antzeman ez duen "ikusteko asko" dagoela adierazi du Ormaetxeak. "Ikasleengan ez dakit, baina arratsaldeetan kanpotik etortzen diren bezeroek nabarmen igarriko dute prezioen igoera" izan dira Ormaetxearen hitzak.

Izan ere, Bizkaiko Kanpusean kokatzen den kiroldegira milaka ikasle gerturatzen dira urtean zehar. Horrez gain, hainbat eskaintza ere ematen ditu kirol-zentroak. "Aurten ez dugu klase berririk, baina iazkoak eskaintzen jarraituko dugu" esan du Unai Ormaetxeak. Erabiltzaileen artean Indoor Zikloak eta Bodybump-ak dutela arrakastarik gehien gaineratu du kiroldegiko langileak; are gehiago, iaz atera zituzten Krossfit klaseak harrera "ezin hobea" izaten ari direla bezeroen artean. Horregatik, kirol saio eskaintza izaten ari den "arrakasta" dela eta, Ormaetxeak espero du urrian izango den BEZ igoerak ez duela "bat-bateko" eraginik izango bezeroen artean. 

Hala ere, zenbat ikasle kexu agertu dira kiroldegiko kuotaren igoera dela eta. “Ez da soilik kiroldegiko prezioen igoera izango – adierazi du Peio Arrizabalaga Geologiako ikasleak – honaino etortzeko autobusen prezio altua ere kontuan hartu behar da”. Ikasle asko suminduta agertu dira; “ekonomia jasaten ari den zerga igoerak eragin zuzena du gizarte osoan; autobusetan eta kiroldegietan izan bada ere, laster nabarituko dugu matrikuletan ere igoera” esan du Leire Ruiz Arte Ederretako ikasleak.

Behin behineko aparkaleku bi jarri dituzten arren, Leioako Kanpuseko lanek istiluak sortzen dituzte sarrerako biribilgunean

Erik LEJARDI OLABARRIA

Aparkaleku berriaren lanak direla eta hainbat arazo sortu dira kurtsoaren lehen egun hauetan Leioako Kanpusean. EHUko errektoretzak aurreko urteko aparkalekuan lanak direla eta beste behin behineko bi aparkaleku jarri ditu autoz Kanpusera doazenentzat: bat atletismoko pista barruan, eta bestea Arte Ederren Fakultate atzean.

Garraio publikoa erabiltzea ere gomendatzen da, hain zuzen autoen gehiegizko presentzia ekiditeko. Bi aparkaleku hauetatik batek hainbat arazo eman ditu kurtso hasierako egun hauetan, atletismoko pistak hain zuzen ere.

Aparkaleku honen kokalekuaren ondorioz sortu dira arazo handienak. Hau Kanpusaren kanpoaldean dago kokatuta, errepidearen bestaldean, eta Kanpusera sartzeko errepidea pasatzean hainbat istilu sortzen dira. Badago bertan dagoen borobila zeharkatzeko zeharbide bat eginda zubi baten bidez, baina ikasleek ez dute hau erabiltzen, eta ondorioz errepidea zeharkatzean hainbat arrisku hartzen dituzte. Hau saihestu eta ikasleak kontzientziatzeko errektoretzatik ikasleen web postara mezu bat bidali dute, hau erabiltzea gomendatuz.

Arazo hauek gehiago larritzen dute lehendik Leioako Kanpusean aparkatzeko zegoen egoera. Hainbat gidarik debekatuta dauden lekuetan aparkatzen dute autoa. Guzti hau gertuago aparkatzeko edota presaka dabiltzalako egiten dute, eta ondorioz ez dute aintzat hartzen zergatik dagoen debekatuta. Ondorioz errektoretzak benetan beharrezko den kasutan gruari deitzea erabaki du. Kasu hauetatik aparte, paperezko oharrak jartzen hasi dira gaizki aparkatuta dauden autoetan. Bertan ohartzen zaie ezin dela bertan aparkatu eta badirela lehen aipatutako bi behin behineko aparkalekuak.

EHUko Bizitzaren Basoan pintadak egin dituzte

Gorka LOPEZ ARANTZAMENDI

Euskal Herriko Unibertsitatean aurkitzen den Bizitzaren Basoan “graffitiak” egin zituzten pasa den abuztuan. Arrosa koloreko pintadak hildakoen omenez eginiko egituraren  eskulturetako bitan burutu ziren. 

Ikasleak haserre agertu dira: “Nahiko sumindu nintzen, -adierazi du medikuntza ikaslea den Saioa de la Mazak- lehenengoko ikasketa egunetik erakusten da Bizitzaren Basoan dagoen jendeari esker prestaketa hobea jaso daitekeela, eta hori miretsi beharra dagoela”. Izan ere, gune horretan medikuntza zein erizaintza ikasleen praktikak ahalbideratzen dituzten gorpuen errautsak kokatu dira azken bederatzi urteetan. “Izugarrizko errespetu falta izan da” leporatu du Iratxe Txarterina erizaintza ikasleak.

Gune hau bereziki garrantzitsua da hainbat ikaslerentzat: “Horrelako egiturak oso urriak dira eta zaindu beharra daude” azaldu du Sergio Matos medikuntza ikasleak. Izan ere,  estatu mailan horrelako egitura bat duen lehenengoko unibertsitatea izan da EHU; eta bakarretarikoa oraindik ere mundu mailan. Ikasleek horrelakorik berriz ez gertatzea espero dute. “Irakasle zein ikasleon esker ona erakusten du Bizitzaren Basoak, -adierazi du Naia Agirre medikuntza ikasleak- eta jendeak hori begirunez tratatu beharko luke bertan zaindaririk egon ez arren”. 

Pintadak udako oporretan zehar margotu ziren arren, albistea bizkor zabaldu zen interneteko blog eta sare sozialen bitartez. “Medikuntzako hainbat ikasle horri buruz aritu ziren twitter-ean, eta hainbat klase-kidek WhatsApp-etik argazkia zabaldu zuten” azaldu du de la Mazak. Aldi berean, Medikuntza Ikasle Elkartearen blogean gertakariaren berri eman zen abuztuaren 17an. Elkarteak adierazi zuenez Bizkaiko Campuseko errektore-ordea den Carmelo Garitaonandiak pintadak ezabatzeaz arduratuko zela hitz eman zuen. Garitaonandiak esandakoa bete izanaren berri jaso zuten duela pare bat egun ikasleek.

Barik txartelaren fase-pilotua irailaren 30ean amaituko da

Liher LARRAÑAGA GABIRIA

2011ko urriaren 30ean hasi zen Bizkaiko garraio publikoetarako “Barik” izeneko txartelaren froga epea irailaren 30ean itxiko da. Cotrabi-ko (Consorcio de Transportes de Bizkaia) lehendakaria den Mikel Torresek esan duenez, 2013ko urtarrilaren 1etik aurrera Barik eta noizbehinkako txartelak izango dira garraio publikoa erabiltzeko abonu bakarrak.

Barik txartela abian jarri zenetik 40.000 erabiltzaile baino gehiago izan ditu, izan ere, kontakturik gabeko teknologia duen txartel honek Metro Bilbao, Euskotran, Bilbobus, Euskotren, Renfe, Bizkaibus eta beste hainbat garraiobidetarako balio du.

Bi Barik mota daude: anonimoa eta pertsonalizatua. Txartel honek eskaintzen dituen abantailen artean azkartasuna eta erabiltzeko erraztasuna daude, era berean eroso egiten dutelarik. Gainera, txartela bankuetan zein kioskoetan kargatu daiteke, 3€ eta 90€rainoko tartean. Beraz, erabiltzaileek kantitate handiak txertatu ahal izango dituzte.

Hala ere, badira desabantaila batzuk. Maria Lopez EHUko ikaslearen esanetan, “orain ezin daiteke txartel berdina bi aldiz pasa, bakoitzak berea izan behar du”. Hala ere, txartel honi esker desabantaila baino abantaila gehiago ditu garraio publikoak, nahiz eta fase-pilotuan prezioekin arazoak izan diren.

Txartela eskuratzeko, aldez aurretik eskatu behar da hitzordua eta urritik aurrera 3€ (anonimoa) eta 5€ren truke (pertsonalizatua) eskuratu ahal izango da Barik txartela.

Aurkezpena

Blog hau 2012ko irailaren 11an sortu dugu eta EHUko Gizarte eta Komunikazio Zientzia ikasle batzuk gara (Maider Leturiaga, Liher Larrañaga, Erik Lejardi eta Gorka Lopez). Hemen landuko dugun gaia gizartea izango da. Hurrengo hilabeteetan zehar gizartean gertatzen diren gora-behera eta tira-birak idatziko ditugu, egunerokotasuna islatuz. Blog hau kide ezberdinez osaturik dagoenez, ikuspuntu ezberdinak jasotzeko aukera ere eskeiniko dizuegu.  Era berean, zuen iritziak jasotzeko ere prest izango gara. Hurrengora arte!!!